12星座戀愛態度
白羊座
戀愛拍緊拖的你~
盡心盡意照顧對方，為對方操心，為對方諗晒，但係過於個人主義，對對方樣樣都管住晒確實會令對方頂唔住。雖然係為對方好，但成日忽略對方的內心感受，呢點真係要好好檢討下。另外持久力唔夠，忍唔住出去拈花惹草都要檢討一下。
金牛座
戀愛拍緊拖的你~
對情人悉心照顧同關懷令到對方對你死心塌地，用情專一更加係你的必殺武器，不過要留意改善一下自己的佔有慾過強，會令對方透唔到氣；另外對物質（可能係金錢或者係其它）過於執著，成日斤斤計較都會令另一半產生反感。
雙子座
戀愛拍緊拖的你∼
你需要一個好似好朋友咁的伴侶，你唔會響另一半面前裝模作樣，會完完整整露出自己的真實一面，Ｒ屁股、撩鼻屎，企響好的角度睇咪叫做坦蕩蕩囉，唔係咁諗佢好快就會覺得好厭倦；另外能量過度分散成日唔得閒亦令你唔夠細心。
巨蟹座
戀愛拍緊拖的你~
談戀愛你永遠係全情投入，為對方付出一切，同時亦都希望對方為自己付出一切，勁鍾意痴住情人，而且最好係由朝痴到晚果隻，呢個行為有時令到另一半真係會頂唔順，另外情緒太過波動亦係另一個令對方頭痛的地方。
獅子座
戀愛拍緊拖的你~
一旦投入一段戀愛，你會傾盡全力等對方得到幸福，而且十分鍾意將呢種幸福晒畀街坊睇一切分享下，老實講你呢個行為未必人人受得住，包括你的另一半，太過戲劇化的生活只會演變成，一係將對方嚇走，一係令佢更加愛你。
處女座
戀愛拍緊拖的你~
潛藏住的大男人同大女人主義令你好鬼鍾意管住另一半，唔單止將另一半照顧得妥妥當當，日常生活、收入支出，甚至連人生目標都會幫佢安排好晒，仲會成日囉囉嗦嗦，不過話時話你的專一同堅持又好鬼吸引人。
天秤座
戀愛拍緊拖的你~
對住另一半你會係一個稱職的男或女朋友，不過！驚寂寞的你鍾意交朋結友，而且成日唔覺意會鍾意左其他人；太過介意其他人的睇法，久而久之慢慢會迷失自我，拍得越耐越抑壓自己的諗法，攪到好唔開心。
天蠍座
戀愛拍緊拖的你~
你拍親拖都會死心塌地，無論食飯沖涼都會諗住佢，做乜都會考慮對方先，總之就係佢佢佢！但係你同樣要對方有一樣的諗法，畀好大壓迫感對方，心血少d都畀你嚇死，而且唔知你諗緊乜亦都令佢冇乜信心。
人馬座
戀愛拍緊拖的你~
同你拍拖，真係頭痕，你開心果陣就日日痴到實，sweet sweet，你唔鍾意果陣想搵你都好難，雖然話各有各私人空間係件好事，但係你對「私人空間」有兩個尺度，你個空間就係你個空間，情人個空間都係你個空間。
山羊座
戀愛拍緊拖的你~
話你對另一半唔好咩你又唔係，你願意為對方付出好多野，但係講到要付出d乜呢，你又要逐樣逐樣計下喎！對自己冇蝕底咪畀囉！好蝕底就梗係唔睬你啦！而且太過傳統同保守都唔係咁易相處得到。
水瓶座
戀愛拍緊拖的你~
你會視情人為屋企人一樣，好似阿媽同阿爸咁，不過講真你份人對屋企人係冇對朋友咁好，你慣左用個心來愛，乜都係玩心照，所以好多時候會令到對方以為你冷漠同埋以為份感情淡左，真係慘！
雙魚座
戀愛拍緊拖的你~
唔論男女都會好似小fans咁對另一半盡情付出，唔叫佢行唔敢行，唔叫佢坐唔敢坐，不過又唔係話你無不滿喎！你只係將d不滿收收埋埋一次爆發，但係因為你火氣不足，所以就算你爆發都只會畀你另一半幫水撥熄！
