靈號房靈房客之卡拉OK嘩鬼追逐
靈號房靈房客之卡拉OK嘩鬼追逐
曾經我係尖沙咀一間卡拉OK做夜間接待員, 我又要講下間卡拉OK既環境啦!
個場中間有一個大廳. 大廳一定擺左好多檯同櫈, 點歌要寫紙仔, 傳遞俾侍應, 到你就即場獻唱, 大廳既其中角落位係一間小小既寫字樓, 而圍住個場側邊就係一間間獨立K房, 有大有細, 相信好多人都知個環境係點, 當時呢D場都幾受歡迎架!
時間係九月份, 有晚我收工後同一班同事留係度唱歌, 跟住同事走啦, 我因為住得遠, 又飲左D酒, 所以好眼瞓, 我就求其係一間四人K房瞓梳化,仲有一個留宿既阿伯, 但佢就瞓另一間房。當時我頭頂向住一塊玻璃窗, 一起身就可以睇到出面廳既情況, 電話機就放係隔離(當時我係冇手提)。大廳只開住少量燈光, 光線可以透過那塊玻璃窗射進來, 我間房就完全關掉所有燈, 關上門就瞓。
唔知瞓左幾耐, 我就俾幾個細路仔既聲浪吵醒。我嘗試唔理佢地照瞓, 但似乎越瞓就越嘈, 我非常非常清楚聽到佢地係大廳玩, 四周圍走來走去, 遠遠近近, 圍住個場係咁跑, 嘻嘻哈哈咁, 感到佢地係度玩追逐, 我連佢地玩到檯同櫈既踫撞聲都聽到好清楚, 我一直死忍, 我估佢地已經嘈左超過大半個鐘, 但係佢地越玩越嘈, 聽D嬉戲聲起碼有好幾個細路仔, 我就忍到火都來, 已經夠眼瞓, 仲嘈住晒, 佢地真係當正呢度係遊樂場咁, 我係Feel到佢地直情玩到癲晒, 突然佢地居然玩到其中一個好大力咁撞埋我房門度, 好大聲(嘭)左一下, 門都震埋, 我冇辦法再忍, 佢地實在太嘈, 又過份, 心諗邊個家長係呢個時候帶D細路來玩呀? 又唔理佢地, 當我諗住起身透過玻璃窗望下出面咩環境, 然後出去鬧人時, 唔知點解起極都起唔到身, 成個人軟弱無力咁, 起唔到身諗住用旁邊既電話打去天文台睇下而家幾點, 隻手伸極都伸唔到出來, 有心無力, 好似俾野(禁住)咁, 唔想我見到佢地, 但由頭到尾我只係聽到佢地既嬉笑聲, 從來聽唔到佢地講任何野, 我唯有焗住忍, 慢慢因為太眼瞓到頂唔順就真係瞓左。
到瞓醒, 成十一點, 見到寫字樓有兩三個女人返來, 一於拿拿聲走去問佢地, 較早時有冇人帶D細路仔來過, 佢地話冇, 晨早流流邊個咁得閒, 係到送D細路返學啦, 點會來呢度。我轉頭問昨晚留夜個阿伯, 佢話尋晚咩聲都聽唔到, 我心諗咁嘈都聽唔到? 一係佢真係聽唔到時運高, 一係佢講大話唔想嚇死我, 好彩班細路由始至終都冇係我間房出現過, 同我講: 姐姐出來陪我地一齊玩呀? 唔係我一早嚇死。
